Online Shopping | التسوق أون لاين وكل ماتحتاجينه من بريد أمريكي وطريقة إنشاء بريد في الـ Myus + أنواع البطاقات المصرفية المعتمدة + مواقع أنصح فيها للتسوق ..

السلام عليكم ورحمه الله ،

يسعدلي أيامكم ..

تقريباً هذا أكثر موضوع ينطلب مني بشكل ماتتصورونه ..

وأنا على وعدي زي ماوعدتكم في هالموضوع ، هذا هو بين يديكم : )

موضوعي اليوم عن كل شئ يخص الـ " Online Shopping "

التسوق الألكتروني وأفضل المواقع الي تعاملت معاها وأنصح فيها ..

وأيش تحتاجين للتسوق أون لاين .. من A الى Z !

كل مايخص التسوق أون لاين وفي إجابة لأغلب أسألتكم ..

حاولت أقدم الموضوع قبل العيد ورمضان بشهر ، أبيكم تستفيدون وتتسوقون للعيد أون لاين

" خلصوا شغلكم وتعالوا أقروا الموضوع على رواق " : )

تقسيم الموضوع كالتالي :

1.  ليش نتسوق أون لاين ؟
2.  ماذا أحتاج لـ أفتح بريد أمريكي وأفضل الشركات ؟
3.  شرح إنشاء بريد أمريكي عن طريق MyUs
4.  أفضل المواقع الي أنصح فيها
5.  نصائح تفيدك بشكل عام !

1- ليش نتسوق أون لاين ؟

التسوق أون لاين يوفر علينا جهد وعناء الذهاب للسوق ،

هذا في حال كنا ساكنين خارج السعودية .. لكن بالسعودية والخليج لها مميزات أكثر

وأهمها الخيارات أكثر وأكبر وكل شئ متوفر أون لاين والأسعار فارق سعر عن الموجود عندنا ..

أرخص في أغلب الاوقات .. أنا مادري ليش اسعار الأشياء عندنا اغلا ؟ استغلال !!

مثلاً ماك عندنا في الخليج ضعف سعره في أمريكا وكندا ..

هذا وأحنا ماعندنا لا ضرائب على المشتريات ولا شئ !

مو معقولة أشتري المنتج من برا ومع الضريبة والتوصيل ويضل سعره أخص من الموجود بالسوق المحلي !

التجارة عندنا فيها تلاعب كبير ! أوكي أربحوا ٢٠٪ يلا نقول اربحوا ٥٠٪ !

لكن عندنا من الجشع وصل الربح في بعض الاحيان ٢٠٠٪ !!

متخيليييين !! اكثر من سعر المنتج ثلاث مرات .. والمستهلك هو الضحية الوحيدة

ولهذا السبب أحنا محتاجين نتثقف بالشراء الأون لاين ..

يكفي جشع وأستغلال التجار لنا كمستهلكين ، لازم نصير أذكياء

سالفة : مسكرا علاجية لتكثيف للرموش أشتريها عادة من أمريكا أو أون لاين ..

وسعرها ٢٥$ تقريباً ١٠٠ ريال سعودي ، واحتجتها ضروري هاليومين ورحت صيدلياتنا ..

بكم تتوقعون حصلتها ؟ ٣٥٠ ريال !!!!!!!!!!

ربح ٢٥٠ ريال فوق سعر المنتج .. ليششششش ! وش هالاستغلال !!

لهذي الدرجة مستغبيين المستهلك ؟ .. فشعاري مع هالجشع " خلوها تخيس عندكم ! "

وغير الأسعار أون لاين بطلة !

الخيارات أوسع وأكثر .. خصوصاً بالمنتجات العضوية والصحية ،

وكثير من البراندز مو متوفرة عندنا ، ولو توفرت تكون بضاعة قديمة أو مخلصة ..

أكثر كلمة أسمعها عندنا بأسواقنا " خلصت " : ) ..

حاولت أكون إيجابية في هالموضوع ، بس ماش مو راضية تضبط معي

مافي شئ يدعوا للإيجابية فيه .. بالعكس الموضوع جالس يتمادا أكثر ،

وأحب أشكر كل تاجر أو تاجرة أسعارها بطلة .. برافو عليكم !

أربحوا بالمعقول مو ضعف سعر المنتج والشحن : )

2- أيش أحتاج لـ أفتح بريد أمريكي وأفضل الشركات ؟

تحتاجين شيئين فقط ..

١- عنوان بيتكم الصحيح بالأنجليزي 

وتجيبينه من موقع البريد السعودي " العنوان الوطني " لازم كل بيت عنده عنوان وطني ،

 لو كنتي ماتعرفينه  بسيطة .. أتبعي الخطوات القادمة .. ولو كنتي

تعرفين عنوانك نطي هالخطوات : )

والتسجيل مجاني ورح يفيدك كثير خصوصاً لو طلبتي شئ ع البريد السعودي مستقبلاً

لكن الآن أنا يهمني تاخذون عنوانكم بالانجليزي بطريقة صحيحة ..

لأن العنوان أهم شئ في التسوق أون لاين !

ومطلوب منك في كل المواقع ..

من هنا ، بعد ماتدخلون هالصفحة ..

تظهر لك بهالشكل :

أختاري التسجيل في العنوان الوطني ..

تفتح لكم هالصفحة :

أختاروا تسجيل الأفراد " يمين "

وبعدها أختاروا " تسجيل جديد "

رح تفتح لكم هذي الصفحة بعد ماتختارون تسجيل جديد " هنا "

وكملوا تسجيل بإدخال جميع معلوماتكم ..

وبعد ماتخلصون اضغطوا التالي

حددوا موقع بيتكم وقبل التحديد " أفتحوا خدمة تحديد الموقع بجهازكم "

ورح يطلع لكم بيتكم بالخريطة اختاروه ..

آخر شئ رح يطلع لكم جدول فيه عنوانكم

بالعربي والأنجليزي

وعنوانكم بيطلع كامل فيه كل هالتفاصيل :

- رقم واسم الشارع باللغتين 

- رقم بيتكم 

- اسم الحي أو المنطقة

- أسم المدينة والدولة

- الرمز البريدي وصندوق البريد

أنسخوه واحفظوا هالصفحة أو صوروها بجوالكم ..

جداً مهمة هالخطوة !

٢- تحتاجون بطاقة إئتمانية ( Visa ) :

 مو كل المواقع تقبل الدفع عند الاستلام ، فلازم يكون عندكم بطاقة فيزا ..

أنا للأمانة ماعندي خبرة في البطاقات الشحن الي من الرجحي والاهلي وغيرهم ،

لكن تقدرون تبحثون بالنت أكثر وتسألون البنوك .. الي هي عن خدمة بطاقات التسوق أون لاين 

فكرتها تشحنونها بالملغ الي تحبون فقط وتشترون منها " مثلاً بطاقة تسوق من بنك الراجحي "

الي اعرفه أنها تطلع بنفس اليوم .. لكن باقي التفاصيل ماعرفها ..

أنا أستخدم فيزتي الأمريكية في كل تسوقي أون لاين ومريحتني للأمانة ،

ما أستخدم بطاقات ثانية إلا الـ American Express 

لكن سهل هالموضوع تواصلي مع بنكك وأسأليهم عن خدمات البطاقات الي عندهم للتسوق أون لاين

وأعتقد الحين كل البنوك صاروا يوفرونها سواء عن بطاقتك العادية الـ Visa

أو بطاقات التسوق المشحونة ! 

براحتكم عاد ..

الحين عرفنا عنوان بيتنا + خلصنا موضوع الـ Visa ..

ننتقل للمرحلة الاهم !

3 - شرح إنشاء بريد أمريكي عن طريق MyUs :

ليش أخترت أشرح هالموقع فقط ؟ لأنه الوحيد الي جربته والي ع حد علمي الأفضل الآن !

وأسعار الشحن فيه ممتازة جداً وبقولكم ع حركة حلوة ماتتوفر الا فيه ..

تسون فيها ترقية لبريدكم مجاناً في حل كنتم مشتريكن فيه أو رح تشتركون ..
والجميل فيه يشحنون فيتامينات وسوائل ..

وش مميزات ماي يو اس ؟

إذا اشترينا أون لاين نحتاج لشركة توصل لنا منتجاتنا لبيتنا ..

كيف ؟ خصوصاً أن اغلب المواقع ماعندها توصيل دولي وماتوصل خارج دولها ،

وش الحل طيب ؟ الحل هالخدمة .. My US توفر لنا خدمة تجميع الشحنات وتوصيلها !

- كيف يعني تجميع ؟

مثلاً اشترينا من ٣ مواقع مختلفة أون لاين ، مابي كل طلب يجيني لحاله ..

بخسر شحن كذا دولي لكل موقع بشحنه لحاله وبدفع قيمة لحالها !

وبيطلع غالي علي جداً .. خصوصاً أن بعض المواقع مايشحنون كل طلباتك مرة وحدة وبشحنه وحدة

اوقات يرسلونها على دفعات " شحنات مختلفة متفرقة "

فخدمة التجميع مفيدة جداً جداً جددداً في هذي الحالة .. يجمعون لك كل شحناتك ويرسلونها لك مرة وحدة

بكرتون واحد ! في دلع أكثر من كذا ؟

يلا نسوي بريد أمريكي مع بعض ..

لازم أعطيكم خصم الماي يو اس !

خصم فضييييع " ماهو اعلان ولا لي منفعه لو ريال واحد من منه ! "

تدخلون موقع منتدى البوابة الرقمية على هذا الرابط :

- هنا -

ليش ؟

لأن البوابة الرقمية متعاونة مع شركة الشحن هذي وتوفر تخفيض

سنة كامله اشتراك مجاني على عضوية البرايم !

وحرام كثير مايعرفون عن هالخاصية فقلت لازم أفيدكم فيها ..

تسجلون بالمنتدى وبعد التسجيل مكتوب لكم الشرح باللنك فوق !

بس لازم تدخلون على Myus من اللنك الموجود بالموضوع الي حطيته فوق ..

عشان يشملكم التخفيض ..

" في حال عندكم بريد أصلاً سابق سجلوا في المنتدى وارسلوا لماي يو اس

رقم عضويتكم ورح يسون لكم أب قريد "

في حال ماتبون التخفيض !

ادخلوا هالرابط ..

https://www.myus.com

ويالله نسوي بريد أمريكي مع بعض : )

( الشرح خاص فيني وبالصور وداخلها الشرح بالعربي )

ورح ينقلنا للصفحة هذي ..

هذي الصفحة موضح فيها أنواع البكجات ..

" نصيحة أختاروا البكج الأساسي / العادي وأقولكم ليش بالأخير : ) "

بعد ماأخترنا نوع البكج الي نبيه " نوع صندوق البريد " وكل واحد له مميزات

وترجمت أهم ميزة عندي " عددة أيام التجميع والتخزين المجانية "

إذا تعديتوا هذي الأيام لكل يوم إضافي " ١ $ " دولار واحد ..

مايعادل ٤ ريال لليوم ، فحاولوا ماتتعدون الأيام الموضحة لكم

حسب نوع صندوقكم !

- البكج الأساسي : ٥ أيام

- البكج الممتاز : ٣٠ يوم

- البكج الممتاز + البريد : ٣٠ يوم

وننتقل للصفحة الي بعدها الي ندفع فيها ونعبي بياناتنا ..

بعدها تنقلنا للصفحة التالية لتعبئة عنوانا المحلي في بلدنا ..

ومعلومات بطاقتنا الفيزا ..

وبعدها رح تطلع لكم هالصفحة ..

وحفظاً للحقوق الصفحة الجاية أخذتها من النت ،

لأن أنا عندي بريد ولا أقدر اسوي واحد جديد طبعاً

وهي صفحة تأكيد الدفع !

بعد الإنتهاء من الخطوة الخامسة، سيتم خصم المبلغ من حساب البطاقة الإئتمانية الخاصة بك وإرسال أيميل لك بالتفاصيل والذي سيحتوي على العنوان الخاص بك. كما أن العنوان الخاص بك سيتم عرضه الصفحة الأخيرة من خطوات التسجيل كما هو موضح في الصورة التالية :

ومبروووك عليكم صارو عندكم بريد في Myus ..

وهذا بريدكم الأمريكي : )

شفتوا المربع الي فيه عنوانكم الأمريكي ؟

هذا تحفظونه عندكم أو صوروه بجوالكم ..أحتياط !

وخلوني أشرح لكم العنوان بالتفصيل ،

أكيد بعضكم يشوفه طلاسم ..

العنوان بيكون كالتالي مثلاً

 " مثال توضيحي وليس عنواني " :

Reem Reem

5874 Express Lane

Suite 432-432

Sarasota, FL 34238

(941) 538-6941

•  الاسم:  الخاص بك الذي استخدمته وقت التسجيل
• العنوان السطر الأول: دائما ثابت في حالة شركة ماي يو اس (My US) وسيكون:

  4283 Express Lane

• العنوان السطر الثاني: هو رقم الصندوق الخاص بك داخل شركة ماي يو اس (My US) وسيكون عبارة عن كلمة Suite متبوعة بستة أرقام مفصولة بعلامة – مثل 432-432
• المدينة/الولاية/الرمز البريدي: دائما ثابت في حالة شركة ماي يو اس (My US) وسيكون كالتالي: المدينة Sarasota, الولاية FL أو Florida والرمز البريدي سيكون 34238
• رقم الهاتف: هو رقم هاتف شركة ماي يو اس (My US) وذلك حتى يتمكن المتجر الذي اشتريت منه بالتواصل مع شركة ماي يو اس () لتوصيل الشحنة. الرقم هو 6941-538 (941)

4- أفضل المواقع الي أنصح فيها :

تسوقي بذكاء ووفري بعض من المال !

رح أعرض في هذا الجزء كل المواقع الي أنصح فيها والي تعاملت معها ،

وبيكون الترتيب كالتالي :

أسم الموقع وعند الضغط عليه ياخذكم للصفحة الرئيسية له ..

وتحت كل موقع شرح لمحتويات الموقع وبأيش يتميز !

لأن من المستحيلات أصور كل موقع أو أشرحه + أغلب شروحات المواقع

لو استعصت عليكم متوفرة بالنت فقط أستخدموا قوقل في البحث عن شرحها : )

وقبل أبدأ بشرح لكم مصطلحات :

- يشحن دايركت = يشحن لدولتكم بدون وسيط / مايحتاج بريد أمريكي أو أجنبي

- مايشحن دايركت = يحتاج بريد وسيط / يحتاج بريد أجنبي .

- تجميع الشحنات = الشحنات تتجمع في صندوق بريدك الأجنبي وبعد التجميع يرسلونها لك مرة وحدة

1- Amazon 

ومين مايعرف أمازون ومايعشقه ؟

أمازون قصة عشق ماتنتهي ! كل شئ احصله فيه

كللل شئ تتخيلونه ! وأفادني كثير وقت ماكنت ساكنة بأمريكا ..

خصوصاً لو اشتركتوا بـ " prime " عضوية البرايم توصلكم الشحنات بنفس اليوم

أو من بكرا ! لدجة اذا تكاسلت اطلع اقضي للبيت مناديل ومنظفات .. الخ 

اقضيها من امازون هههه ! كلللل شئ يخطر ع بالكم فيه ،

مكياج / ملابس / اجهزة الكترونية / أكل / ديكور / .. الخ 

فكرة أمازون أن فيها بائعين وفي أمازون نفسه ..

كيف أعرف طيب ؟ ركزي مين البائع لو امازون هذا ثقة !

ولو بائع غير امازون اقري تقييم البائع والمنتج " كل منتج له تقييم "

لو عدد التقيمات مرتفع + الناس تمدحه = ثقة 

في ميزة بأمازون كنت أستخدمها بأمريكا ماعندي فكرة لو تشتغل هنا !

كنت أبيع كتبي الي أخلص منها " في الكتب المستعملة " خصوصاً الكتب

الي قيمتها وقت ماشريتها ٣٠٠$ أتحسف اتخلص منها ..

( يوصل دايركت بعض المنتجات وبعضها يحتاج بريد أمريكي )

كيف أعرف يشحن دايركت ولا لا ؟

 - شوفوا هالصورة مثلاً / بشتري كمبيوتر للألعاب لأخوي -

2-  Nordstrom

نوردستروم هدا ديبارتمنت ستور " ايش يعني "

يعني يضم ماركات كثير تحت سقف واحد !

هاي أند براندز + براندز عادية ..

المميز فيه أنه يحتوي على كل شئ تقريبا ً

( ملابس \ فساتين سهرات وعادية \ شنط \ شوزات \ ميك أب \ عناية \ اطفال \ لانجري .. الخ )

وكثير بنات يستخدمونه لأن يتوفر فيه أغلب الماركات الي مو متوفرة عندنا للميك أب ..

وفيه ماك برضو ، في كلاراسونيك ، في ماركات كثيررر أدخلوا تفرجوا فيه !

( يوصل دايركت لكن ماأنصح بيطول ع بال مايوصلكم )

وإذا طلبتوا منهم اطلبوا الشحنة تكون مع بعض مايرسلون كل شئ لحاله ..

لأنهم أوقات يرسلون كل قطعة من محل مختلف لنوردستروم فبالتالي تكون مو شحنة وحدة ،

لاتنسون هالشئ ! ودايم عندهم تخفيضات حلوة ..

3-

  Neiman Marcus

Bloomingdales

نيمن ماركس وبلومينقديلز حطيتهم مع بعض لأنهم نفس الفكرة ..

نفس فكرة نوردستروم بس على أغلى ، الماركات الي فيه بالاغلب فقط هاي أند براندز !

( يوصلون دايركت لكن برضو ماانصح أفضل تشحنون على بريدكم الامريكي )

4- Macys

ماحب هالمحل سبحان الله : ) .. لكن شئ شخصي فيني هالمحل مافيه عيب العيب فيني هههه !

لكن نفس فكرة الي فوق لكن ماركات عادية " بولو / مايكل كورس .. الخ "

5- Asos

أسميه موقع بنات السعودية ..

أتوقع أغلب البنات يعرفون وطلبوا منه ،

ممتاز فيه :

( ملابس / فساتين / اكسسوريز / ميك اب / .. الخ )

ميزته المهمه ( يوصل دايركت وأنصح فيه ومايطول ٧ أيام بالكثير ! )

6- Farfetch

يضم أكثر من ٤٠٠ بوتيك تحت سقف واحد !

نزلت هالموضوع أتكلم فيه عن تجربتي بالصور معاه ..

" هنا "

( يوصل دايركت )

7- Forever 21

فوريفر الأون لاين وخارج السعودية غير تماماً عن الي موجود عندنا !

للأسف الي عندنا " بقايا قطع الي برا ! "

أسعاره حلوة وفي متناول الجميع أحب قطعه اليومية أو للدوام والبجايم عنده بطله !

وغني عن التعريف أصلاً ..

( مايوصل دايركت )

8-

Ted Baker

J.Crew

ANGL

Banana Republic

BCBG

كل هالمواقع عندهم بالعادة قطع حلوة خصوصاً " الفساتين "

ينقذوني إذا بشتري لبس للعزايم أو طلعات رسمية ..

وللسهرات بي سي بي جي أخر واحد بطل !

( مايوصلون دايركت )

9-

Abercrombie & Fitch

Aeropostale

American Eagle Outfitters 

Hollister Co.

لبس يومي ، أو دوامات !

واسعارهم حلوة ..

( مايوصلون دايركت )

10-

Henri Bendel

Tiffany & Co

أكسسوريز ومجوهرات ..

هنري بيندل عشق الأبدي للأكسسوارات ،

ومو بس عندهم اكسسوارات وشنط واكواب وكالندرز .. الخ 

للأسف فقط متوفر بأمريكا ، الأون لاين شوبنق حقهم وخدمتهم بطله !

تيفاني عاد اشهر من نار على علم مايحتاج له توضيح ..

( هينري بيندل يوصل دايكرت )

11-

Crate and Barrel

Bed Bath & Beyond

كل شئ يخص البيت !

من مواعين / طبخ / أثاث / تخزين / مفارش سرير / .. الخ ،

عشق هالمحلين عندي .. لازم تتصفحونهم 

( مايوصلون دايركت )

12-

Francesca's

هذا المحل عشقي !

ماقد سبق وطلبت منهم أون لاين ..

بس من المحلات الي اذا دخلتها ماطلعت ،

عندهم قطع مميزة وغريبة ماحصلها بأماكان ثانية 

ملابس / شوزات / اكسسوريز / شنط ..

( مايوصلون دايركت )

13-

Janie and Jack

Children salon

مواقع للبس الأطفال بنات و أولاد ..

من أروع الي تسوقت فيهم هدايا !

" حلو تطلبون لعيالكم قبل العيد "

( شيلدرن صالون فقط الي يوصل دايركت )

14-

PAPYRUS

للهدايا والتغليف وجميع أنواع الكروت الي تخطر ببالكم

" قرطاسية جميلة "

( ماتوصل دايركت )

15-

Target

Walmart

Whole Foods Market

سوبرماركتز مشهورة بأمريكا ..

خصواً تارقت ، فيهم ميك أب وديكور ومطبخ .. الخ !

( ول مارت يوصل دايركت الباقيين لا )

16-

NewYorkDress.com

من أشهر المواقع الامريكية لفساتين الزواجات والعرايس ولحفلات ،

ماسبق لي وتعاملت معاهم شخصياً لكن طلبت لصديقة منه ووصل لبيتي بأمريكا بأسبوع  ..

عندهم خدمة التفصيل حسب مقاسك " مو شرط من المقاسات الجاهزة " لكن يطول ممكن شهر !

لكن ماعليه اختلاف هالموقع ثقة جداً .. وعندهم مصممين كثير تحت سقف واحد ،

( يشحن دايركت )

+

( متوفرة اللغة العربية بالموقع )

17-

Drugstore

iHerb

Sephora

Sigma Beauty

theBalm

Tarte

MAC

Inglot

Nordstrom

Macy's

Amazon

Ulta Beauty

Beauty

أشهر مواقع الميك أب والعناية الشخصية والكريمات والتجميل ،

بعضها يشحن دايركت وبعضها لا ..

" سيفورا والتا أوقات يقبلون فيزا السعودية وأوقات لا أنتي وحظك "

❤ المواقع قابلة للزيادة في الأيام الجاية / أحس أني ناسية كثير ❤

نصائح تهمك :

أولاً : خططي قبل الشراء !

البضاعة مارح تهج .. خططي قبلها بوقت وأعرفي وش تبين

ولو توفرت القطعة في اكثر من موقع قارني الاسعار ..

وشو الافضل لك ..

ثانياً : قيسي كل شئ تشترينه ..

عادة مواقع الملابس يحطون لكم جدول للقياسات ،

لاتشترين تخمين ! يفرق القياسات من دولة لدولة ومن مصنع لمصنع ..

فدائماً خلي معاك المتر " سعرة بريال او ريالين بجرير او أي مكتبة "

وقيسيه فيه اطوالك وخصرك .. الخ ،

حسب الي بتشترينه طبعاً !

ثالثاً : أستغلي فترة الخصومات ..

ورح اكتب موضوع مخصص للخصومات واوقاتها حول العالم في وقت لاحق ،

لكن انصحك اذا بتشترين شئ غالي تأجلينه لوقت الخصم ..

ممكن توفرين فوق الـ ١٠٠٠ ريال سعودي ،

وحطي ببالك فترة الخصومات تختلف من موقع لموقع 

لازم تشيكين عليهم كل فترة ! وسجلي المواعيد بالكالندر عندك

" ودائماً مااقصر في فترة العروضات اعرضها لكم على سناب شات "

رابعاً : أستخدمي كوبونات التخفيضات ..

عادة يرسلونها لك أيميل لو كنتي مسجلة في موقعهم

أو

في مواقع فقط مخصصه لكوبونات الخصم

والكوبونات قد تشمل تخفيض ع المنتجات او الشحن !

وهذي اكثر موقعين أنصح فيهم ..

( ممواقع توفر كوبونات الخصم )

RetailMeNot Coupons

Online Coupons

خامساً : جمعي شحناتك ومشترياتك بوقت واحد ..

مثلاً : اوقات احتاج شئ واحد فقط من امازون أأجل موضوعه

لين اطلب أشياء كثير بعدين ! ليش ؟ اوفر لك بالشحن ..

سادساً : مصداقية الموقع ..

اختبري مصداقية الموقع قبل تشترين منه خصوصاً المواقع الي مو معروفه ،

اكتبي اسمه بقوقل واقري تجارب الناس معه قبل تتوهقين !

وحتى المنتجات الجديدة عليه اذا ماقد سمعتي احد يتكلم عنها عامليها بنفس المعاملة !

دام عندنا مصدر معلومات " بحر من المعلومات " ليش مانستخدمه ؟

سابعاً : إذا عندك زي سؤال بخصوص أي شئ بالموقع ..

سواء شحنتك أو أي شئ دوري على خانة " Contact with us "

أو " Life Chat " .. وتواصلي معهم !

دايم تجيني أسأله مثلاً " ريم شحنتي ماوصلت وش اسوي ؟ طيب أنا وش عرفني ؟

ودايم ردي يكون تواصلي مع الموقع والجواب عندهم مو عند احد غيرهم ! "

ثامناً : أسألي أو ابحثي قبل إذا الموقع يشحن دايركت لمنطقتك أو لا ..

وقارني الاسعار أوقات الشحن دايركت يكون أغلى من الغير دايركت !

تاسعاً : تأكدي من صحة بياناتك وإيميلك وعنوانك قبل الدفع ،

عاشراً : تتبعي شحنتك دائماً ، كل المواقع توفر تتبع الشحنة ..

ومن حقك اصلاً تشوفين وين وصلت !

بعض المواقع يحطونها لك بالرابط تدخلينه وتشوفين وين وصلت شحنتك

وبعضهم بس يعطيك " رقم الشحنة " خذي الرقم وروحي لشركة الشحن

الي انتي مسبقاً عارفة ان شحنتك عليها .. ولو ماعرفتي ارسلي للموقع اسألي !

وحطي رقم شحنتك في خانة " tracking my shipment "

ماعندي لغة أنجليزية / كيف اطلب ؟

بسيطة جداً واللغة ماهي عائق مستحيل لك ..
في خاصية بترجمة قوقل يترجم لك موقع كامل لك
من أي لغة تبينها للعربية !
وهذا الموضوع شرحت فيه
الطريقة بالتفصيل 
- هنا -

-

وأخيراً خلصت الموضوع ..

بدون مبالغة أخذ مني ٤ أيام تجميع وكتابة رغم كل أنشغالي

حاولت أخلصه لكم بفترة قياسية ، قبل رمضان !