مقشر القهوة | إعادة تدوير لـ بُن القهوة الخاص فيكم ..

سكراب القهوة ☕

الي شكلي بسميه " مقشر ريم " ..

من كثر ما أشتهر ماشاء الله : )

هالسكراب صار لي اسويه من سنين

ولا يمكن استغني عنه صدق يجنننننننن وتحسونه يرطب من قلب ويشيل كل الطبقة الميتة من جلدكم ويوحد لكم لون الجسم مع الاستخدام المتكرر ويخفف من السيلوليت بشكل كبير مع الاستخدام المتكرر ..

فضيع وجربوه متأكده بتدمنونه زيي !

" اقروا عن فوائد القهوة للبشرة بـ قوقل "

مقادير الماسك :

كل الي نحتاجه ( قهوة / سكر / زيت ) 

فقط ! سهل جداً صح ؟

- القهوة .. احب اعيد تدوير قهوة كبسولات نيسبريسو واذا ماتوفرت عندي قهوة تركية او امريكية سواء مستخدمه ولا جديدة ماتفرق 

لكن يُفضل القهوة تكون عالية الكافيين ، لأن الكافيين محارب ممتاز

للسيلولايت ويساهم في تفتيح بشرتنا ..

" القهوة العربية ماتنفع "

أي قهوة عندكم يمشي حالها ماعدا العربية او النسكافيه مايصير

تستخدمونه لانهم مارح يفيدونكم أبداً !

- السكر .. افضل سكر اسمر بس بكيفكم تقدرون تستخدمون الابيض 

- زيت جوز الهند .. ماقدر استغني عنه وادخله بكل شي هالزيت 

يرطب من قلببببب ومليان فيتامينات تشد وتوحد بشرتنا

إذا مو متوفر عندكم استبدلوه بأي زيت تحبون سواء زيت زيتون او زيت اللوز .. الخ 

وبس هذي الاشياء الي تحتاجونها رخيصة ومتوفرة بكل بيت 

ماعاد صارلكم عذر ماتسون تقشير لجسمكم بكل شاور !

طبعاً هذي الوصفة الأساسية تقدرون تبدعون فيها

على حسب مزاجكم ..

في ناس تحب تضيف عصرة ليمونة او ملعقة عسل ..

أنتم بكيفكم ، بس انا هذي طريقتي الي مرتاحة عليها 

وعادي تسون كمية وتخزنونها عندكم شهر كامل ماتخرب ،

وتنفع تسونها هدايا بعلب جميلة وتهدونها للناس الي تحبونهم ..

لأن فعلاً اشوفها هدية قيمة ،

طريقتي في الأستخدام :

بعد ماتغسلون جسمكم بالشاور بالصابون سوا له تقشير بالسكراب لمدة 10 دقايق 

وافركوا بلطف بشرتكم وبشكل دائري عكس عقارب الساعة !

عشان نحرك الدم في البشرة ونستفيد من السكراب أكثر ..

لاتبالغون في الفرك ، خليكم رقيقين مع جسمكم !

لأن الفرك بعنف مارح يخليك بيضا ! بالعكس بيسمرك أكثر : )

 وبعدها بس اشطفوا بالموية فقط ..

وأستمتعوا بنعومة جسمكم

ليش هالمدة كلها للفرك؟ عشان الكافيين يمديه ياخذ وقته ويتغلغل في بشرتنا ونستفيد منه ..

أستخداماتي للمقشر :

أستخدمة لجسمي كامل مع يديني ورجليني ..

لكن أنتبهوا لاتستخدمونه على الوجه !

بشرة وجهنا حساسة .. والمقشر شوي خشن

لكن أنتي بكيفك تقدرين تستخدمينه لو تحبين ،

كم مرة أستخدمه ؟

أنا عني بكل شاور .. أيه بكل شاور أستخدمه

لكن أنتي تعرفين جسمك لو حساس خليها مرتين بالاسبوع فقط

أيش لاحظت بعد الاستخدام لسنيين ؟

لاحظت فعلاً جسمي صار ناعم ..

ماتطلع لي ولله الحمد أي شعر تحت الجلد ،

والسبب لأني أقشر جسمي دايم وأتخلص من الجلد الميت ..

" ماشاء الله "

توحدت عندي مناطق بجسمي ، وبنفس الوقت

صار فيها صفاء ماشاء الله ..

والي الكل يلاحظة دايم ، جسمي فيه لمعة حلوة ..

والسر كله من المقشر والترطيب !

بنزلكم الايام الجاية خلطة كريماتي للترطيب

الي استخدمها بعد كل شاور ..

وبعد السكراب تحديداً

-

دمتم بحب ،

Reem