Fix+ from MAC | الفكس بلس من ماك واستخداماتي المتعددة له ..

Fix +

!Must have 


وشو الفكس بلس؟ 

هو مياه معدنية ومعززة بالفيتامينات صحية للبشرة ..

وماك من أوائل الماركات الي تفردت في هالشئ !

وبعدها صارت اغلب البراندات تطلع لها شئ شبيه فيه ،

ليش أشوف أنه من الضروري يكون عند كل بنت ؟

" على فكرة ماهو مثبت للميك أب كثير بنات فاهمينه غلط "



( إستخداماتي له )

١- قبل الميك أب وبعد فقرة ترطيب الوجه بالكريمات ..

ابخ منه ٣ او ٤ بخات وانتظره ينشف شوي وابدأ بالميك اب حقي ..

هذي الحركة تخلي الميك اب حقكم دوي اكثر وينمد ويندمج بسهولة ويساعد نوعاً ما في بقاء الميك اب اكثر

( لاحظو ماقلت يثبت الميك اب وغلط هالشي رغم انهم يسوقونه على هالاساس احياناً وهالشي غلط ، مايثبت الميك اب أبداً )

٢- يساعد في تثبيت الاي شادو اكثر .. كيف ؟

بخة وحدة على فرشة الآي شادو وخذو لون الاي شادو حقكم وشوفوا كيف بيطلع واضح وبقمنتد ..وثابت اطول فترة ممكنة !

٣- قبل أرسم حواجبي بالباودر ابخ منه بخه على فرشة الحواجب يطلع اللون ثابت وقوي ..

٤- إذا الكونسيلر ثقيل شوي ابخ على البيوتي بلندر بخة أو بختين ويسهل علي دمجه وتوزيعه ..

٥- إذا عندي بقمنت " شادو منثور " بخه وحدة على فرشة الاي شادو واخذ من البقمنت يساعد في تثبيته ويطلع اللون واضح من أول مرة ..

٦- بعد ما اخلص كل مكياجي وثبته بالباودر ..

ابخ من بعيد على كل وجهي بختين او ثلاثة ، هالحركة جمييييييلة وانصحكم فيها تخلي وجهك رطب وشكله صحي اكثر ..

ولمعة نظارة رهيبة .. 

ولو شكل الميك اب باودري أو كيكي يشيلك اياه ويخليه طبيعي ..

٧- إذا انكسر شي من مكياجكم تصلحونه فيه .. 

قد جربته على آي شادو مكسور وضبط : ) !

٨- استخدمه كرذاذ بارد ومنعش لوجهي بعد يوم طويل ومشمس ..

٩- ارسم فيه كحل بالاي شادو بعد ما ابخه على فرشة الاي لاينر ..

هالحركة تنفع مع ميك اب صباحي او ناعم ..

خصوصاً لو ماتبين لون اللوك حاد !

١٠- اذا ابي لمعة الهاي لايتر قوية بخه على فرشة الهاي لايتر وشوفوا كيف بيطلع .

١١- ابخ على البيوتي بلند أو الفاونديشن برش ، وامد فيه الفاونديشن ..

ينمد معاي بشكل أسهل ويخليه أحلا !

-

الي في الصورة ، كلهم نفس الشئ !

لكن ماك جتهم فترة نزلوا فيها الفكس بلس بروائح وللأسف كانت لمتد اديشن ..

كلها نفس المفعول بس الروائح غير ،

ومن عشقي للفكس بلس عندي باك أب احتياط جديد مافتحتهم " اخاف يخلص وماعاد احصله هههه "

-

- من وين ؟

من ماك | بجميع الفروع ،

سعره مو ثابت للأسف كل مرة يرفعون سعره !

أخر مرة اخذته كان ب ١١٠ ريال ..

" الي بالنكهات "

دمتم بحب ،

Reem