طريقة المقدوس الأصلية بزيت الزيتون والمكسرات ..

أتوقع المكدوس عشاقه كثير !

أحب أعتذر منكم بنات ..

لاني تأخرت مانزلت طريقة المكدوس 💘

بس كنت انتظره يجهز واصوره لكم مرة وحدة ..

يلا ركزوا معاي بالشرح ،

هو سهل مرررة بس يبي له تركيز ..

ورح يضبط معكم من أول مرة 

- مكدوس أم ريم 💘 -

المقادير والطريقة:

 " المقادير كلها تقديرية "

تجيبون باذنجان صغار مررة ، اصغر حجم .. بالكمية الي تحبون .. احرصوا يكون فريش ،

تغسلونهم مررة زين وتقصون راسها من فوق تشيلون الزايد بس .. وتسلقونها بموية بس " نص سلق " .. فقط نص سلق اول ماتحسونها شوي صارت لينه صفوها من الموية الحارة وحطوها بموية باردة عشان توقفون عملية الطبخ .

بعد كذا تقطعون طرف كل باذنجان .. لين توصلون للنص بس " يعني تسون فيها فتحات جانبية " وترشونها من برا وجوا بملح صخري " او العادي " ..

اهم شي تاكدو ان كمية الملح كافية وكثيرة تقريباً لكل باذنجانه صغيرة نص ملعقة صغيرة ملح ..

وبعد ماتخلصون كل الكمية وتملحونها من برا وجوا تحطونها بشبك او صفاية كبيرة ورتبوا راسها لتحت " جهه الفتحة الي عملناها تحت " عشان تطلع كل الموية .. ونرص كل الباذنجان بهذي الطريقة"

ونحط فوقه ثقل يضغط عليهم .. " صحن ثقيل مثلاً "

وانتبهوا لازم تحطون تحت الصفاية صحن .. وخلوها يومين بالثلاجة لين تطلع كل مووية الباذنجانات .. وبتشوفون مويتها كلها نزلت وتراكمت بالصحن الي تحت الصفاية ! 

الباذنجان كذا صار جاهز للحشو ..

نجهز الحشوة 

- الحشوة -

فلفل احمر حلو الكبير " هالبينو "

" الي ماتعرفه تسأل موظف قسم الخضار بالسوبرماركت "

وفلفل رومي حبة يعطي نكهه لذيذة

4 فصوص ثوم

جوز مجروش وكثروا

فلفل حار لو تحبون " اختياري "

وشوي زيت زيتون

وتخلطونها بالخلاط لين يصير مجروش

وافضل الخلط تخلونه خشن ..

وصارت جاهزة الحشوة 

ببرطمان قزاز " لازم قزاز عشان الطعم مايتغير"

تحطون طبقة زيت زيتون درجة اولى ..

وتبدأون بحشي كل باذنجانه بالحشوة🍆 .. وتصفونها

بالترتيب فوق بعض وكل طبقة صبوا فوقها شوي زيتت زيتون ، الى ان تنتهي الكمية ..

و آخر شي إذا خلصتوا كل الطبقات غرقوا البرطمان بزيت الزيتون لين النهاية  ..

- زيت الزيتون يحفظها من التعفن ويساعد على تخلل المكدوس ويعطي نكهه لذذذيذذذة 

وقفلوها زين .. واتركوها يوم برا الثلاجة 

و 6 ايام داخل الثلاجة ، وبعد مايخلص الاسبوع كامل

يصير وقت اكلها 

واستمتعوا بالطعم الي يبكي من اللذذذذة 

هذي طريقة أمي كاملة بالمقدوس وتعمدت اكتبها بالتفصيل الممل عشان يضبط معكم ..

والي صارلها سنييين تسويه بنفس الطريقة ،

جربوه وصدقوني بتقاطعون مكدوس السوبرماركت

هذا الذ واطعم وفررريش والاهم صنع بحب 

وبالعافية ..

Reem